鼻敏感發作絕對唔可以由得佢打幾個乞嗤、流下鼻水就算數。長期鼻塞同流鼻水，會令鼻竇同鼻腔黏膜腫脹，更加容易積藏細菌病毒，亦會令鼻膜變薄，增加受感染嘅機會。

鼻敏感發作嘅時候，其實係免疫系統誤把原本無害嘅致敏源當作攻擊目標，引致發炎過敏反應。免疫系統要費力去「對付」依啲致敏源，就冇可能對真正嘅敵人全力以赴。而對抗流感、COVID 等病毒，當然需要免疫系統嘅absolute focus ！被削弱嘅免疫系統，亦同時令康復進度較慢，所以鼻敏感患者往往傷風感冒後，鼻塞流鼻水嘅情況持續，好長手尾。

瑪麗醫院嘅研究指出，超過九成嘅鼻敏感患者對塵蟎有敏感反應，其他普遍嘅致敏源包括：曱甴、動物毛髮、黴菌、花粉等。所以儘量減低塵蟎同身體嘅接觸，已經可以令鼻敏感有改善。

要好好預防同處理鼻敏感，除左靠西藥，還可以參考以下心得：

1. 勤用鹽水洗鼻，減少鼻竇鼻腔內嘅細菌病毒積聚
2. 避免放地毯同毛公仔喺睡床範圍，將積存喺依啲物件嘅塵蟎同身體嘅接觸減到最低
3. 使用防塵蟎床單、枕袋同被袋
4. 如有塵蟎吸塵機，定期吸床褥、枕頭同地毯
5. 定期清洗冷氣機隔塵網，清除積聚喺依度嘅塵蟎同黴菌
6. 避免著有毛嘅衣服，以免受羊毛同兔毛刺激
7. 從中醫角度，鼻敏感與肺氣同脾腎較虛弱有關，要加強肺和脾腎嘅功能，可以試下食冬蟲夏草或靈芝補充膠囊
8. 每天飲用接骨木花精華或接骨木花茶，能預防及治療咳嗽、喉嚨不適、鼻敏感和氣管不適

患有鼻敏感嘅家長，就算小朋友未有鼻敏感嘅症狀，其實都唔可以掉以輕心。敏感係可以遺傳嘅，而有個說法話 “You grow into your allergies”，意思最初可能敏感症狀輕微，不易察覺或者身體未受影響，但係如過持續接觸致敏源，免疫系統對致敏源嘅反應就會加劇，敏感症狀亦會越來越嚴重。家長們要特別注意呀！

註：瑪麗醫院研究於東方日報 2007年4月報道